البالونة - مصطفى ابراهيم

فى حاجات علشان نعرف درجة قوتها بنكسرها

وحاجات ف ادينا عشان نعرف اننا عايزينها بنخسرها

كدبت ف عمرك كام صاحب علشان كان نفسك تتطمن ؟

وخسرت اصحابك واتطمنت

طب كام بالون فرقعوا منك وإنت بتنفخهم ع الاخر؟

وعرفت اخرهم بس ندمت

دلوقتي فهمت أنا عاوز إيه

وانا كنت بفرقع بلالين ليه

أنا عاوز حاجه بدون آخر

أو حتى بآخر ما اوصلوش

كام حيطه ف ضهري اضرب واهري

ف بدنهم بس ما يتهدوش

شيء مش مغشوش

مضمون دايما

من غير ما احتاج إني اتأكد

أو حتي اخاف إني اتنكد

لا يكون ف الاخر برضه فاشوش

يا بشر عرفاني وعارفه أنا مين

بلغوا اسفي لكل البلالين

كلنا كنا ف يوم بالونه

فقعتنا تجارب بني أدمين

بلالين عايشين نفسها تلقي

حد يصدق ويقدرها

متأكد من إنه عاوزها

من غير مايجرب يخسرها