فـــي الْطُفـولة نَبْكي ولكِن سَرَعان مَا تَرِضِينا الْحَياة..
وَعِنْدَما نكبُر نُحاوِل إرْضاء الحياة وَلَكِنَّها سَرَعَان مَا تَبْكِيـنا

يا براح مخلوق علشانى ..
الكون ده مبيساعنيش ..
وِش و مرسوم ف مرايه ..
لكن مبيضحكليش ..
الخوف مسكون بالحيرة ..
معجون مَيٌـة سؤالات ..
و غيوم ف سمايا كتيرة ..
و غناوى نغمها سُكات ..
يا طريق بتنادى الخطوة ..
أمشيك .. متوصٌلنيش ..
أنا عمرى ما كنت حزينة ..
و دموعى مفارقتنيش ..
ضحكة و بترن تجلجل ..
و صداها يرد .. مفيش ..
يا براح محتاجة براحك ..
أتدارى .. ميعرفونيش ..
و ده وعد ما بينى و بينك
مش هامحِى الشمس ف قلبى
أنا بس هارُد الشيش ..

معلش

دقق ورا الكرمشة
عيون ما تعرف غش
الفرحة لو ف الحشا
بتبان قوام ع الوش
القلب صافى لبن
و الآهة طعم الشجن
لو مهما يقسى الزمن
تصبر تقول معلش ..

وحشتنى

ورقة بيضا مستعدة ...
و القلم مسنون بشدة ...
و الحروف جاهزين ف راسى ...
و الكلام وطنى و حماسى ...
بس كل ما احاول اكتب ...
تيجى فكرة تشدنى ...
و أما ازَوغ منها و اهرب ...
تانى ليها تردنى ...
و القَى كل الصفحة فيها ..
كلمة واحدة ..

وحشتنى

اللى بنى مصر

اللى بنى مصر كان ف الأصل مش رايق
عشان كده كله شال الهم و اتضايق
لو فرحة عدت علينا صدفة و تنادى
على طول تدمع عنينا و بحزن تتعايق

يا كل لحظة ألم عـدِّى بقى عـدِّى ..
يا كل موجة شجن بتاخدنى و تودِّى ....
يا صُحبة الأحزان ، صاينة أوى العِشرة ؟!!
يا جرح نشَِن رشق عشَرة على عشرة ..
سكنِت غنايا آهات و سكنْت فالتوهة ..
طرحت عيونى دموع و رموشى خبوها ..
مكتوب عليا الوجع و اللا بقيت غاوى ؟؟
القُرب زاد غربتى و البعد ما يداوى ..
يا سكة إمتى وصول ؟؟
صابر و نفسه ينول ..
يا باب أيا مقفول ..
أنا ع البراح ناوى ..

دقق

دقق ورا الكرمشة
عيون ما تعرف غش
الفرحة لو ف الحشا
بتبان قوام ع الوش
القلب صافى لبن
و الآهة طعم الشجن
لو مهما يقسى الزمن
تصبر تقول معلش ..